 |
Y Gofalwr
(i Merfyn) Un â gofal gwlad gyfan, yn dwrdio’r dorf â’i enaid ar dân, un â’i agenda ei hunan: i ddangos yr hyn sy’n bosib, yn nhir gro ac ar y grib, a mesur yr amhosib, yr erydu ym mharadwys, y tir cau a’r torri cwys, ac oglau fferm ac eglwys; i ddangos y graith ddi-angen y bu e’n y Trallwng yn ben, i rwygo’r graig o’r gragen, a’i her erwin i ninnau yw i beri i hud Dyfed barhau, i Glwyd ddiogelu hadau tyner gwanwynau’r werin, i fedi’r drysni anodd ei drin a gwefr yr olygfa gyfrin; i feithrin melin nad yw’n malu a siwrne nad yw’n sarnu’r fawnog gyfoethog a fu: i ddwyn i’r llefydd unig hen hadau’r Gymru wledig, yn goed a gwraidd, llannerch a gwig. Iwan Llwyd Awst 2003 |